Sinerrek dagiti kameng ti National Bureau of Investigation (NBI) ti maipagarup a love scam hub sadiay Makati City nga agar-aramat iti artificial intelligence (AI) a mangallukoy kadagiti saan nga agsuspetsa a biktima manipod idiay Europe ken Middle East.
Maibasar iti report, saan a bummaba iti 167 a Pilipino ken dua a Chinese citizens ti natiliw bayat ti operasion nu sadinno, natiliwanda nga agar-aramid ti scamming operations.
Nasarakan dagiti otoridad ti “scripts” iti kompyuter ken nadiskobreda ti mobile phones nga otomatiko a makisinnukat ti mensahe kadagiti biktima.
Naduktalanda pay dagiti SIMS a saan a rehistrado para iti mobile phones.
Sigun kenni NBI National Capital Region director Ferdinand Lavin,posible a mangipilda ti kaso kontra kadagiti suspek gapu iti panaglabsingda ti Anti-Financial Account Scamming Act ken ti Cybercrime Prevention Act.
Kabayatanna, binallaagan ti NBI dagiti Pilipino a mangmangged kadagiti scam hubs a saanda koma a maallukoy iti kuarta a mabalinda a magun-od gaputa makadangran laeng daytoy kadakuada.
