BAGUIO CITY – Nadanunen dagiti rescuers ti nasurok 50 a kilometro iti maika-16 nga aldaw ti search and retrieval operations dagitoy para iti pannakabirok dagiti dua nga agtutubo a naiyanod idi Agosto 3 sadiay Gayasi River, Wangal, La Trinidad, Benguet.
Iti panakiyuman ti Bombo Radyo Baguio kenni Yoshio Labi, La Trinidad MDRRM Officer, kinunana a paturongdan sadiay Baguilin, La Union kalpasan ti panagsawarda sadiay Kamog, Sablan.
Kinunana nga agarop iti 50 a rescuers ti agsawsawar babaen iti panakinnadang dagiti nagduduma a maseknan a lokal a gobierno, ahensia ken volunteers.
Inaklonna a dakkel a karit kadagiti rescuers ti kinakurang ti pwersa dagiti agresresponde nupay kompleto dagiti pasilidad nga ar-aramatenda iti nasao nga operasyon.
Maipalagip a naiyanod da Rommel Tadena ken Harley Rufino idi pay Agosto 13 iti Gayasi River sadiay Wangal, La Trinidad idi ginandatda a ballasiwen daytoy ngem napigsa ti ayos ti danum gapu iti habagat.
