KALINGA PROVINCE – Malamlamayan ita ti bagi ti 18-anyos nga estudyante kalpasan a nasarakan daytoy iti irrigation canal idiay Bakras, Purok 7, Bulanao Norte iti pasado alas tres ti parbangon ita nga aldaw, Oktubre 11.
Maibasar iti inisyal nga imbestigasyon dagiti otoridad idiay Tabuk City, dua a babai nga agtawen iti 18-anyos ken 19-anyos ti naaksidente iti pasado alas sais ti malem idi Huwebes, Oktubre 10.
Sigun iti 19-anyos a babai, nagtaud da iti maysa a business establishemento idiay Purok 5 ken paturongda iti maysa pay nga establishemento idi saan a nacontrol ti 18-anyos ti motor rason ti pannakatnagda iti irrigation canal idiay Bakras.
Dagus nga inispal dagiti tambay ti 19-anyos a babai ken saanen a naispal ti 18-anyos a kadwana.
Ti 18-anyos ket residente ti Nambaran bayat a ti 19-anyos ket residente ti Bayao, Pinukpuk, Kalinga.
Dagus met a naipatungpal ti search and rescue operation babaen iti nagtinnulong a pwersa ti Special Action Force, Bureau of Fire Protection, ken ti City Disaster Risk Reduction Management Office.
