BAGUIO CITY – Nagtugawen kas Acting Mayor ti munisipyo ti Bangued sadiay Abra ti konsehal ti 19-anyos a konsehal a ni Joaquin Enrico ‘Kiko’ Valera Bernos kalpasan a naan-anay a naikkat iti takem ti lolona a ni Mayor Dominic Valera ken nasuspindir iti makatawen ti lolana a ni Vice Mayor Mila Valera.
Nagsapata ti konsehal kas Acting Mayor ti Bangued iti sangwanan ti inana a ni Abra Governor Joy Valera Bernos ken ti panagtugawna iti posisyon ket naibasar iti law of succession ti Local Government Code.
Maipalagip nga inikkat ti Office of the Ombudsman manipud iti takem ni Mayor Valera kalpasan a napaneknekan a guilty daytoy iti kaso a grave misconduct ken conduct prejudicial to the best interest of service.
Nagramot daytoy iti reklamo nga impalubos ken pinapartak ni Mayor Valera dagiti transaksiyon ti Bangued LGU iti gasolinaanda nga agasawa ken iti printing shop ti anakda ken asawa daytoy.
Nasuspindir met iti makatawen ni Vice Mayor Valera gapu iti nagbalin nga akemna iti isyu.
Naamuan nga idi pay Lunes a ni Bernos ti agpirpirma iti amin a dokumento iti Office of the Mayor ti Bangued.
Agserbi daytoy iti agarup makatawen wenno agingga a mawaswas ti panakasuspindir ti lolana.
Agserserbi met ita kas Acting Vice Mayor ni Councilor Salve Borja.
