--Ads--

ABRA – Napasamak ti rinnupak iti nagbaetan ti 50th Infantry Battalion (50IB) ken grupo ti Ilocos-Cordillera Regional Committee (ICRC) sadiay Barangay Dulao, Malibcong, Abra ita nga aldaw, Nobiembre 20, 2026.


Iti exclusive interview ti Bombo Radyo kenni Police Captain Gerry Rigos, ti Malibcong Municipal Police Station, kinunana a manarimaan ti patrolya dagiti kameng ti 50th Infantry Battalion idi nasabatda ti agarup pito nga armado nga indibidual a maatap a kameng ti ICRC.


Bimmayag ti rinnupak iti agarup 20 agingga 30 a minutos ken nagpatingga iti pasado 6:18 p.m.


Iti agdama, awan paylaeng ti naipadamag a nadangran iti napasamak nga insidente.


Sigun kenni Police Captain Rigos, nangisayangkat ti militar iti blocking force tapno malapdan dagiti armado a grupo ngem temporaryo a naisardeng ita a rabii.


Kabayatanna, agpalpalagip ni Rigos kadagiti residente a saandan a rumrummuar iti pagtaengan iti kanito a mapasamak dagitoy nga insidente.


Kidkiddawenna metlaeng kadagiti residente a makitinnulong iti gobierno babaen iti panangipaayda iti lokasyon dagiti armado a grupo no addaan man dagitoy iti impormasyon.


Mabalin metlaeng a makikoordinar wenno tumawag dagitoy iti Malibcong MPS para iti pannakatiliw dagiti nasao nga aramado a grupo.//mp4