Isaysayangkat ita ti Bangued Municipal Police Station ti naununeg nga imbestigasyon seknan iti nasarakan a bangkay ti maysa a lalaki a registered nurse idiay Sitio Sitio Linasin, Barangay Zone 1, Bangued, Abra.
Iti kaudian a report, nabigbig ti biktima a ni Tam-Jay Camunay Colet, lalaki, adda iti usto nga edad,maysa a registered nurse, ken tubo ti Barangay Tumalip, Licuan-Baay, Abra ngem mannarimaan a residente ti Zone 7, Bangued, Abra.
Nabigbig ti identidad daytoy babaen iti Professional Regulation Commission (PRC) Identification Card a narekober manipud iti bulsa daytoy.
Sigun iti pablaak ti Bangued Municipal Police Station, nakaawat ti awag ti Duty Municipal Tactical Operations Center (MTOC) ti nasao a police station alas-6:20 ti agsapa manipud iti maysa a concerned citizen seknan iti nasarakan a maysa a bangkay iti nadakamat a sitio.
Dagos met a nagresponde dagiti kameng ti Bangued Municipal Police Station tapno iberipikar ti nasao a report.
Sigun iti inisyal a report dagiti imbestigador, nasarakan ti bangkay iti igid ti maysa a dalan a nakabalot iti maysa a motorcycle cover ken transparent a plastik bayat a ti saka daytoy ket nakatali aramat ti packaging tape.
Iti abay ti bangkay, nasarakan ti maysa a blue a Honda XRM 125 a motorsiklo nga addaan plaka 4002 AM.
Gapu iti nasao a pasamak, dagos a nagkiddaw ti tulong dagiti imbestigador iti Scene of the Crime Operatives (SOCO) para iti umno a panangiproseso ti crime scene.
Kalapasanna, nangisayangkat metlaeng ti forensic examination dagiti tao ti Abra Provincial Forensic Unit iti panangidaulo ni PCPT Ryan Dave E. Castillo.
Sigun iti umuna a resulta ti eksaminasyon, nag ti biktima iti saksak iti makin-ngato a paset ti likod, tengnged, kannigid nga abaga, ken kanawan a paset ti sentidona.
Agtultuloy pay laeng ti imbestigasyon ken follow-up operations tapno maamuan ti napasamak, mabigbig dagiti karaman iti krimen, ken maamuan ti motibo dagitoy.
Guyguyugoyen met ti Bangued Municipal Police Station ti publiko nga agbalin a dagitoy a naridam ket ipakaammoda a dagos kadagiti otoridad ti anyaman nga impormasyon, mapagduaduaan nga indibidual wenno aktibidad a mabalin a makatulong iti panangsolbar iti nasao a kaso. //bombokaren.c.sapirao
