BAGUIO CITY – Nakemmeg ti dua a drug personality iti nagsina a buy-bust operations nga insayangkat dagiti otoridad ditoy Baguio City ken iti probinsia ti Benguet.
Nakemmeg ti Cordillera Regional Top Ten Drug Personality a ni Joseph De Vera Igama, 32-anyos, residente ti Camp 7, Kennon Road, Baguio City iti operasyon a naisayangkat sadiay Sumbrero, Ambuklao, Bokod idi kanikadua.
Nakumpiskar kenkuana ti dua a pakete ti maatap a shabu nga aggatad ti P37,400 bayat a narekober iti ikorna ti naaramat a buy-bust money.
Simmaruno a nakemmeg ti maysa a pintor iti operasyon a naisayangkat iti asideg ti maysa a hotel sadiay Campo Filipino, Baguio City idi kalman.
Nabigbig daytoy a ni Joselito Saludares Martinez alyas ‘Hapon’, 44-anyos, tubo ti Dingras, Ilocos Norte ken residente ti Lower Engineer’s Hill, Baguio City.
Nakumpiskar kenkuana ti dua a pakete ti maatap a shabu bayat a narekober ti naaramat a buy-bust money.
Sumangsangon dagiti dua iti kaso a panaglabsing iti RA 9165 wenno ti Comprehensive Dangerous Drug Act of 2002.
