![](https://img.bomboradyo.com/baguio/2019/07/crim.jpg)
BAGUIO CITY – Nakastrek ti dua a graduates iti dua nga unibersidad ditoy Baguio City iti Top 10 ti kaleppas a June 2019 Criminologist Licensure Examination iti pagilian.
Maibasar iti resulta, nagun-od ni Claire Daguasi Rufino manipud iti University of Baguio ti maikapat a pwesto kalpasan a nakaala ti 89.85 percent a grado.
Nagun-od met ni Shiela Rose Ann Ud-ulon Balangue manipud iti University of the Cordilleras ti maikawalo a pawesto kalpasan a nakaala ti 89.30 percent a grado.
Maipalagip a dumanon iti walo ribo ti nakapasa iti nasao a licensure exam dagiti nagtupos iti kurso a criminology.
Kabayatanna, nagtalinaed met ti University of the Cordilleras kas numero uno kadagiti top performing schools iti nasao nga eksaminasyon kalpasan nga amin nga examinees ti unibersidad ti nakapasa.
Nagun-od met ti University of Baguio ti maikalima a pwesto kalpasan a nakailistada iti 80% a passing rate kalpasan a 64 kadagiti 80 nga examinee-da ti nakapasa iti nasao nga eksaminasyon.