BAGUIO CITY – Inladawan ti Police Regional Office – Cordillera ken ti Armed Forces of the Philippines nga ‘isolated’ ti dua nga insidente a nagresulta iti minimal a panakariribuk ti linak ken kappia iti dua a voting precincts sadiay Abra iti mismo nga aldaw ti eleksion.
Sigun kenni P/Brig. Gen. Israel Ephraim Dickson, Regional Director ti Cordillera PNP, dagus a nakontrol dagiti nasao nga insidente a nailista sadiay Bangued, Abra isut gapuna a ‘generally peaceful’ pay laeng ti kaleppas nga eleksion iti pakabuklan ti Rehiyon Cordillera.
Kinunana nga idi aldaw ti eleksion ket nailista ti uppat laeng nga insidente ti maatap a harassment, commotion, panaglabsing iti election liquor ban ken vote buying.
Innayonna a pakabuklan a 64 a tao ti nakemmeg iti lima nga insidente ti panaglabsing iti liquor ban ken nailista daytoy iti Baguio City ken Mountain Province bayat a pakabuklan a 37 a kaso ti maatap a vote buying ti naireklamo ngem maysa laeng ti naberipikar a nakakemmegan ti maysa a suspek.
Maipalagip a nasurok 7,900 a pulis ken soldado ti naiwaras iti entero a Cordillera para iti kaleppas a midterm elections.
Ipalpalagip pay ni Dickson nga agleppas laeng ti COMELEC gun ban inton June 12, 2019.
