Inaprubaranen ti Senado ti singasinging a 2025 national budget nga aggatad ti P6.352 trilion.
Addaan daytoy iti sangapulo ket walo a botos a pabor, awan ti nagkontra ken maysa ti abstention.
Sakbay daytoy, sinertipikaran ni President Ferdinand Marcos Jr ti 2025 badyet kas “urgent” isut rason nga impasa ti Senado ti national budget iti maikadua ken maikatlo a pannakaibasana iti uneg ti maysa nga aldaw.
Inlawlawag ni Senate Minority Leader Aquilino Pimentel III a ti panag-abstain-na ket gaputa saan nga ummanamong iti desision ti kakaduana a mammanday-linteg.
Sigun kenkuana, kasapulan paylaeng nga adda ti emergency a kasapulan a panagsertipikar ti Presidente.
Iti met kaduana a ni minority senator a ni Senador Risa Hontiveros, inlawlawagna a pimmabor daytoy nga ipasa ti badyet gaputa nanayunan ti badyet para kadagiti Inter-Agency Council against Trafficking, ken ti National Coordination Center Against Online Sexual Abuse and Exploitation of Children and Child Abuse and Exploitation Materials.
Inikkat metlaeng ti Senado ti P39.8 bilyon nga alokasion para iti Department of Social Welfare and Development nga Ayuda para sa Kapos ang Kita Program (AKAP) ken daytoy ket nairaman iti Assistance to Individuals in Crisis Situation (AICS) program.
Ti Assistance to Individuals in Crisis Situation (AICS) ket pinagdebatian iti nagbaetan ti House of Representatives ken Senado idi Bi Cameral gaputa mapapati nga innayon ni House Speaker Martin Romualdez ti AKAP iti DSWD a saan nga ammo dagiti sumagmamano a senador.
Nanayunan met ti badyet ti Philippine National Police tapno makaibangonda ti lima pulo ket uppat a police sation iti nagduduma a local government units.
