Impakaammo ti Department of Migrant Workers (DMW) ti adadda a panangparegta ti nasao nga ahensiya kadagiti programada tapno maipaayan ti suporta saan laeng a dagiti overseas Filipino workers (OFWs) iti sabali a pagilian nu di ket pati metlaeng dagiti pamilyada a nabati iti pagilian, nangnangruna dagiti OFWs nga adda idiay Middle East.
Impanamnama pay ti nasao nga ahensiya a nakasaganada anyaman nga oras nga adda dagiti mangiyebkas nga OFWs nga agkiddaw iti tulong tapno makaawid iti pagilian a Pilipinas.
Nu saan met, ibagada kadagiti kabagyanda iti siudad ti Baguio tapno isuda ti mangireport iti nasao nga opisina.
Impetteng ni DMW-Cordillera OIC Regional Director Cheryl Daytec-Yangot a napateg ti panangsustinir ti komunikasyon kadagiti Pilipino a mangmangged idiay ballasiw-taaw.
Malaksid iti dayta, inlawlawag met ni OIC Regional Director Daytec-Yangot nga adda dagiti idiaydiayada a tulong kadagiti pamilya dagiti OFWs a nabatida iti pagilian a Pilipinas.
Itantandudo ti nasao nga ahensya ti “whole-of-government approach” no sadino tunggal ahensiya ti gobyerno ket suportaranda dagiti programa para kadagiti OFWs.
Karaman kadagiti ipapaay ti nasao nga ahensya iti rehiyon Cordillera ket ti Psychosocial Services a nakasagana a tumulong anyaman nga oras, saan laeng nga iti panawen ti krisis.
Malaksid iti dayta, adda metlaeng ti scholarship program para kadagiti kapamilya dagitoy.
Alalukoyen met ti nasao nga ahensiya a saan nga agkedked dagiti overseas Filipino workers (OFWs) nga agkiddaw kadakuada iti tulong. //kcs
