Kinumpirmar ti Department of Migrant Workers (DMW) dumanon iti uppat ti bilang dagiti Pilipino a nadangran kalpasan a nabombaan ti King Khalid International Airport sadiay Saudi Arabia.
Tallo kadagiti nadangran ti adda iti ICU bayat a maysa ti naituding a makaruar iti ospital.
Awan ti nailista a Pilipino a pimmusay iti panagraut idi Sabado.
Maibasar iti datos, dumanon iti 12 nga indibidual ti pimmusay bayat a 309 ti nadangran iti panangraut ti Houthis iti nasao nga airport.
Sigun kenni Labor Attaché Dominador Salanga ti Migrant Workers Office (MWO) sadiay Riyadh, agtultuloy ti panangipaay daytoy iti kasapulan a tulong para kadagiti Pilipino a nadangran.
Agtultuloy metlaeng ti koordinasyon dagitoy kadagiti lokal nga otoridad ken ospital sadiay Riyadh tapno makompirmar no adda pay ti dadduma a Pilipino a nadangran iti nasao nga insidente.
