BAGUIO CITY – Pimmusay ti 21-anyos a lalaki kalpasan a nabagbagsol daytoy dagiti saan pay a nabigbig a suspek idiay Km5, Asin Road, Baguio City pasado alas onse idi rabii, Oktubre 1.
Nabigbig ti biktima a ni Jansel Pelayo, driver ken residente ti Tadiangan, Tuba, Benguet.
Maibasar iti inisyal nga imbestigasyon dagiti otoridad, hinarang dagiti lima a suspek ti lugan ni Pelayo ken ginuyodda manipud iti lugan sakbay nga inaramidda ti nasao a pammagsol.
Dagus a naglibas dagiti suspek babaen iti taxi nga addaan plate number a YAB3087 nu sadino nagturong dagitoy idiay Tuba, Benguet.
Kabayatanna, naiturong ti biktima iti pag-agasan ngem pimmusay metlaeng daytoy.
Manarimaan ti panag-anup dagiti maseknan kadagiti lima a suspek karaman dagiti ebidensiya nga inaramat dagitoy iti nasao a krimen.