Pimmusay ti 21-anyos a lalaki kalpasan a nalmes daytoy iti Towing Falls sadiay Lower Poblacion, Sablan, Benguet alas dose singko itay pangaldaw.
Ti biktima ket maysa a minero ken residente ti Sitio Naiba, Tuding, Itogon, Benguet.
Maibasar iti imbestigasyon ti Sablan MPS, nagturong ti biktima kadwana ti dua a pagayamna iti falls para iti recreational swimming.
Nupay kasta, saan nga impakaammo ti biktima iti kakadwana a saanna nga ammo nga aglangoy.
Bayat ti panaglangoy ti dua a kadwana, limmagto metlaeng ti biktima ngem sumagmamano a minutos ket saandan a makita.
Gapu iti daytoy, nagkiddaw ti dua a kakadwa ti biktima ti tulong.
Dagus met a nangipatungpal ti search and rescue operation dagiti civilian volunteers agingga a nabirukan daytoy.
Nangipatungpal pay dagiti rescuers ti CPR agingga a simmangpet dagiti personnel ti Sablan MPS ken BFP Sablan.
Naitaray ti biktima iti ospital ngem naideklara metlaeng ti ipupusay daytoy itay 1:56 ti malem.
