BAGUIO CITY – Mangnamnama ti mayor ti Baguio a mapapartak ti panakaiwaras dagiti bakuna kontra iti COVID-19 ditoy siudad kadagiti masungad a lawas.
Sigun kenni Mayor Benjamin Magalong, manamnama a maisangpet iti siudad ti dumanon iti 11,000 doses ti AstraZeneca COVID-19 vaccine a ginatang a mismo ti lokal a gobyerno ti Baguio.
Kinunana a manamnama pay ti panakaisangpet ti kanayonan a bakuna ti Pfizer ken Gamaleya Sputnik V a maiwaras to kadagiti makaawat ti maikadua a dose ti bakuna.
Innayonna nga inton sumaruno a bulan ti Agosto ket manamnama nga adda manen ti sumangpet nga 18,000 doses ti AstraZeneca vaccine a ginatang ti lokal a gobyerno ti Baguio.
Mainaig iti nasao a damag, imbinglay ni City Administrator Engr. Bonifacio Dela Peña a 2,500 a doses ti AstraZeneca vaccine ti nabingay ti Baguio manipud iti nasyonal a gobyerno idi kalman nga isu ti naiwaras ita nga aldaw.
Iti interview ti Bombo Radyo Baguio, kinunana a naaramat ti 140 doses kas second dose dagiti 140 nga indibidual nga immuna a nabakunaan iti daytoy kas first dose.
Linawlawaganna pay nga amin a naaramat ditoy siudad a bakuna a dimmanon iti nasurok 123,900 doses ket nagtaud amin iti nasyonal a gobyerno.
Gapu iti daytoy, inyapela ni Engr. Dela Peña ti panag-uray dagiti umili ti siudad gaputa awan pay ti sinmangpet iti 380,000 doses ti bakuna a ginatang a mismo ti lokal a gobyerno ti Baguio.
Impasiguradona met a tunggal adda ti sumangpet a bakuna iti nasyonal a gobyerno ket kanayon nga agkidkiddaw ti mayor ti siudad iti agbalin a bingay ti Baguio.
