BAGUIO CITY – Nagnegatibo manipud iti COVID-19 dagiti 27 a personnel ti Land Transportation Franchising and Regulatory Board (LTFRB) – Cordillera a naipasidong iti swab ken rapid test.
Sigun kenni LTFRB – Cordillera Regional Director Engr. Lalaine Sobremonte, kiniddawda iti Baguio City Health Office ti panakaipasidong dagiti empleyadoda iti COVID-19 testing.
Kinunana a daytoy ket gaputa kaaduan kadagiti personnel ti ahensia ti direkta a makipulpulapol iti publiko isut gapuna a dakdakkel ti posibilidad a makaptan dagitoy iti nagduduma a virus, pakairamanan ti COVID-19.
Dinakamatna a dagiti naipasidong iti COVID test ket dagiti personnel ti LTFRB-Cordillera a nadutukan iti Public Utility Vehicle Modernization Program, Office of the Transport Cooperatives ken maysa nga utility worker.
Naamuan a manipud kadagiti nagpa-test ket 15 ti naipasidong iti swab test bayat a 12 dagiti naipasidong iti rapid test gapu iti kinakurang ti swab test kits.
Impanamnama pay ni Sobremonte ti regular a panakaipasidong dagiti empleyado ti LTFRB-Cordillera iti COVID-19 test tapno maliklikan ti ad-adda pay a panakaiwaras ti nasao a sakit.
