Makisalip ti delegasyon iti Baguio City iti 29 manipod iti 30 nga ay-ayam iti 2024 Batang Pinoy idiay Puerto Princesa Palawan.
Iti panakiuman iti Bombo Radyo kenni Gaudencio Gonzalez, ti Sports and Development Officer iti Baguio City, ti delegasyon ket buklen ti 625 nga atleta, coaches, medical team, ken sports staff.
Karaman metlaeng nga umatendar dagiti daduma nga opisyales iti Baguio City iti panangidaulo ni Mayor Benjamin Magalong partikular iti panaglukat iti nasao a pasalip.
Sigun kenni Gonzalez, saanda nga in-pressure dagiti atleta tapno madependaran ti titulo iti Baguio City kas kampeon nu di ket inyunay-unayda kadagitoy nga umdasen nga aramidenda ti amin a kabaelanda para iti napintas a performance.
Nupay kasta, impetteng ni Gonzalez a tarigagayda latta ti agballigi ita a tawen nu sadino,kinunana nga agtaltalinaed ti kinapositibo dagitoy.
Innayon ti opisyal a pagpigsaan ti delegasyon dagiti combat sports kas iti kickboxing, taekwondo, muay thai, ken mangnamnama dagitoy a makaipaay dagiti atleta iti napintas a performance iti jiu jitsu.
Malaksid iti dayta, maysa pay a pangnamnamaanda iti napintas a performance ti Archery team, kasta metten dagiti team sports kas iti basketball.
Kabayatanna, nawaya latta met dagiti nagannak a sumurot kadagiti annakda a makisalip nupay kasta, dagitoyen ti makaammo kadagiti maaramatda gapu ta saanen a karaman dagitoy iti nailatang a Php17 million a pondo para iti delegasyon.//Bombo Rob Dominguez
