Agtultuloy ti panakaipatungpal dagiti nagduduma nga ay-ayam para iti 2nd phase ti Baguio-Benguet Educational Athletic League (BBEAL) 34th Season.
Iti panakiuman ti Bombo Radyo kenni Danny Cong-o, Technical Board ti Baguio-Benguet Educational Athletic League (BBEAL), nalpasen ti elimination period para iti volleyball nu sadino naikkat ti bunggoy ti University of Baguio (UB) iti men’s category kasta met ti Baguio College of Technology (BCT) iti women’s category.
Sigun kenni Cong-o, ti quarter finals ti volleyball ket inton Hunyo a uno iti agdama a tawen ken ditoy nga agbibinalubal ti Univerity of Cordillera (UC) ken Saint Luis University (SLU) iti women’s category ken ti Baguio College of Technology (BCT) kontra iti Saint Luis University (SLU) iti men’s category.
Innayon ni Cong-o a dagiti daduma nga ay-ayam pakairamanan ti Taekwondo, Football ken Futsal ket maangay iti Benguet State University sadiay La Trinidad, Benguet iti nagduduma nga aldaw manipud Hunyo a uno agingga Hunyo a tres, iti agdama a tawen.
Agpada nga inton Hunyo a uno ken Hunyo a dos ti Athletics ken Lawn Tennis iti Wangal Sports Complex ken swimming a maipatungpal iti Baguio Swimming pool.
Kinuna ni Cong-o a saan a nairaman ti ay-ayam a softball ita a season.
Kabayatanna, dumanon laeng iti agarup lima a pagadalan ti agbibinalubal kadagiti nagduduma a kategorya gapu ta daduma kadagiti pagadalan ket saan a nakasagana.
Nupay kasta, namnamaen ni Cong-o nga iti sumaruno a season ket umadon dagiti makikompete.
Iti agdama, pangpanggepen met ti committee ti Benguet Educational Athletic League (BBEAL) a makikoordinar kadagiti nagduduma a media oulet para iti nalaklaka a diseminasyon dagiti resulta ti nasao a competition.
Kabayatanna, naituding ti semi finals inton Hunyo a kwatro ken ti championship inton Hunyo a nuebe.//Bombo Mera Pacpacan
