BAGUIO CITY – Pimmusay ti tallo a lallaki kalpasan ti engkwentro iti nagbaetanda kadagiti pulis sadiay Bacsil, Bangued, Abra idi parbangon.
Nabigbig dagitoy a da Michael Gonzales, 40, tricycle driver; Ariel Vasquez Isao, 29, unemployed, agpada a residente ti Bangued, Abra ken ni Glenford Soria Agaid, 30, jobless, residente ti Peñarrubia, Abra.
Sigun iti Cordillera PNP, ni Isao ket sigud a nakemmeg iti kaso a panaglabsing iti Comprehensive Firearms and Ammunition Regulation Act idi November 2018 ken iti frustrated murder idi 2016.
Naamuan a mangisaysayangkat dagiti pulis iti checkpoint idi killaat a limmabas ti maysa a tricycle ken liniklikanda dagiti pulis.
Gapu iti daytoy, kinamat dagiti pulis babaen iti luganda ti nasao a tricycle.
Nupay kasta, pinalpaltogan dagiti nakalugan iti tricycle dagiti pulis isut gapuna a bimmales dagitoy a nagresulta iti panakapapatay dagiti tallo.
Narekober met ti PNP-SOCO manipud iti crime scene ti saggaysa a paltog manipud kadagiti napapatay, magazines, ken sumagmamano a bala.
Nakumpiskar pay kadagiti dua a napapatay ti pito a pakete ti mapapati a shabu.
Naiturongen dagiti bangkay iti maysa a punerarya sadiay Abra.
