BAGUIO CITY – Nakemmeg ti tallo a minero a suspek iti agtultuloy a forest fire sadiay Sitio Bagweng, Tinongdan, Itogon, Benguet.
Iti interbyu ti Bombo Radyo ken ni FO2 June Mayam iti BFP-Itogon, kinunana a nakemmeg dagiti suspek a taga-Barangay Ucab babaen kadagiti opisial ti barangay ngem nakalibas ti dadduma a kakadwa dagitoy.
Kinunana a maatap a naguram dagiti suspek kadagiti bee hive wenno balay ti ayukan iti kabakiran tapno makaala dagitoy iti diro ngem nagresulta daytoy iti uram.
Dinakamat ni Mayam a nangrugi ti uram idi pay Marso 12 ken dagus daytoy a nagkayamkam iti ngato a paset ti bantay.
Awan met ti tao a nadangran wenno balay a nairaman a nauram ngem maibasar iti assessment ken adda dagiti mula a kape ken mangga a napuoran ken dumanon iti agarup 30 nga ektaria ti nauram.
Agtultuloy ti imbestigasion ti BFP tapno maduktalan no mano ti gatad dagiti nauram bayat a nakabaluden dagiti suspek ken sumangsango dagitoy iti kaso nga arson.
