BAGUIO CITY – Natiliw ti tallo a wanted persons iti probinsia ti Kalinga kalpasan ti serye ti panangiserbi dagiti otoridad iti nagduduma a warrants of arrest dagitoy idi kanikadua ken idi kalman.
Immuna a nakemmeg sadiay ti managan Jerome Bommusao Calsiyao alyas Dennis a residente ti Basao, Tinglayan, Kalinga ken nakalista a No. 1 Most Wanted Person iti provincial level ti Kalinga iti maikatlo a kwarter ti 2018 ken No. 6 Most Wanted Person iti provincial level iti maikatlo a kwarter ti 2019.
Naduktalan a maysa daytoy a kameng ti rebelde a New People’s Army, partikular iti Komiteng Larangang Gerilya – AMPIS iti sidong ti Platoon William.
Sumangsango ni Calsiyao iti kaso a frustrated murder nga addaan piyansa a P200,000.
Simmaruno a natiliw sadiay Pinukpuk, Kalinga ni Melnar Altero a sumangsango iti kaso a panagrames nga awanan ti piyansa.
Nakalista daytoy a numero uno a most wanted person iti municipal level ti Luna, Apayao.
Natiliw pay sadiay San Juan, Tabuk City, Kalinga ni Basyag Calsiyao a sumangsango iti kaso a frustrated murder nga addaan ti piyansa a P200,000.
Nailista ni Calsiyao kas maikasangapulo a most wanted person iti city level ti Tabuk iti maikadua a kwarter ti 2017.
