BAGUIO CITY – Agtaltalinaed nga apektado iti iligal a droga ti tallo a barangay ti probinsiya ti Benguet.
Pakairamanan ditoy ti barangay Abatan sadiay Buguias, barangay Balili ken Pico sadiay La Trinidad.
Iti panakaiyuman ti Bombo Radyo Baguio, dinakamat ni Pltcol. Dominga Terrado, dadaulo ti PCADU-Benget a bimmaba ti datus dagitoy gaputa kadagiti napalpalabas a tawen ket nasursurok pay ngem iti tallo a barangay ti apektado iti iligal a droga.
Impettengna a naideklara ti Badeo ken Tacadang sadaiay Kibungan, Benguet kas drug cleared barangays uray pay adda ti eradication a maipatpatungpal sadiay.
Inlawlawag ni Terrado a communal land ti nakaimulaan dagiti marijuana ken awan pay ti matiltiliw a cultivators isu’t gapuna a saan a maikonsidera dagitoy kas drug affected barangays.
Impaganetgetna nga agtultuloy ti panakibinnadangda iti nagduduma a yunit ti pulisya ken iti PDEA tapno maragpat ti kampanya a madalusan ti amin a barangay iti rehion manipud iti iligal a droga.
