BAGUIO CITY – Agpapaimbag iti pagagasan ti maysa a tricycle driver bayat a nakaruaren ti dua a pasahero daytoy kalpasan ti aksidente a panangdungpar ti maysa a trailer truck iti naglugananda a tricycle sadiay Lower Poblacion, Sablan, Benguet idi kalman.
Nabigbig ti tricycle driver a ni Tenorio Danao bayat a nabigbig dagiti pasaherona a da Marson Dacuag, 46-anyos ken Jose Paos, 27-anyos, ken bin-ig dagitoy a residente ti Delles, Burgos, La Union.
Nabigbig met driver ti trailer truck a ni Rogelio Gabiter Jr., 39-anyos, residente ti Ville Verde, Nueva Viscaya.
Maibasar iti imbestigasyon, daldalyasaten ti trailer truck ti pakurba a paset ti kalsada nga agturong sadiay La Union ngem limmabes daytoy iti linyana iti kalsada.
Gapu iti daytoy, nasagid ti tricycle a dumaldalyasat met iti bangir a linya ti kalsada.
Dagos met a naiturong dagiti nakalugan iti tricycle iti pagagasan babaen kadagiti nagresponde a pulis ken bombero.
Mainaig iti daytoy, palpalagipan manen ni PCapt. Salvador Anas, hepe ti Sablan MPS dagiti motorista iti panagannad dagitoy kabayatan ti panagmaneho wenno panagdalyasatda kadagiti kalsada tapnu maliklikan ti kapada nga insidente.
