Inwaragawag ni Senate President Pro Tempore Panfilo “Ping” Lacson a tallo laengen a pirma dagiti senador ti kasapulan tapno maipasa ti partial committee report ti Senate Blue Ribbon Committee seknan iti imbestigasyon iti naanomalyaan a flood control projects iti pagilian.
Karaman kadagiti immunan a nagpirma iti partial committee report ket sa Senate President Vicente Sotto III, Commiittee Chair Sen. Ping Lacson, Vice Chairman Erwin Tulfo, Sen. Bam Aquino, Sen. Risa Hontiveros, ken Sen. Kiko Pangilinan.
Nupay saan a miyembro iti komite, pinalubosan ni Senate President Sotto nga agpirma met laeng dagiti ex-officio.
Sigun met kenni Senator Lacson, addan ti dua a senador ti nangiyebkas a nakasaganadan nga agpirma.
Adda dagiti sumagmamano a miyembro a nangbawi kadagiti pirma gapu iti maatap a panangkumbinsir kadakuada iti sigud a kaduada iti majority bloc.
Nupay kasta, impetteng ni Senator Lacson a saanna a piliten ti asinonam tapno agpirma.
Maipalagip a temporaryo a nasuspindir dagiti panagdengngeg iti nasao nga isyu gapu ta sigun kenni Lacson, awan ti turongna nu awan ti maiparang a committee report, banag a saan a mailinya iti sursurotenda a pagalagadan ti Senado. //bombokaren.c.s
