BAGUIO CITY – Negatibo iti 2019 novel coronavirus ti tallo manipud iti uppat a patient under investigation (PUI) ditoy Cordillera Administrative Region.
Kinumpirmar daytoy ni Dr. Jennifer-Joyce Pira, dadaulo ti Infectious Disease Cluster ti Department of Health-Cordillera.
Kinunana a karaman kadagiti negatibo iti novel coronavirus ti maysa a naibilang a PUI ditoy Baguio, maysa sadiay Mountain Province ken maysa sadiay Benguet.
Kinunana pay nga iti agdama ket maur-uray ti resulta ti laboratory test ti maysa pay a PUI ditoy rehion.
Dinakamat ni Pira a nakaruaren iti pagagasan dagiti tallo nga indibidual ken naikkaten ti nagan dagitoy iti listaan dagiti PUI ken maibilang laengen dagitoy kas person under monitoring (PUM).
Kabayatanna, saan pay a nakaipaay ti DOH-Cordillera iti impormasion seknan iti damag nga adda ti tallo a PUI sadiay Abra.
Sigun ken ni Dr. Pira, awan ti report wenno impormasion a naipadanon iti opisina seknan iti nasao a banag.
