Imbutaktak ni Commission on Elections (Comelec) Chairperson George Erwin Garcia a pakabuklan iti 31 a contrators ti nagidonar iti panagkampanya dagiti kandidato bayat ti 2025 midterm elections, no sadino 20 a kandidato ti nagnumar iti daytoy.
Gapu iti dayta, kinunana a kitkitaenda no dagitoy ket addaan iti kontrata iti gobierno.
Impettengna pay a ti Political Finance and Affairs Department (PFAD), ti responsable a mangsukimat ken mang-validate iti statements of contribution and expenditure dagiti election candidates.
Inlawlawagna a ti certification manipud iti Department of Public Works and Highways ket napateg tapno mabigbig no dagiti contractors a karaman iti listaan ket addaan iti kontrato iti gobierno wenno awan.
Innayonna pay a maipaulog ti show-cause orders kadagiti contractors a mabigbig a karaman iti nasao a banag.
