BAGUIO CITY – Dumanon iti 31 nga establishimento manipod iti 187 a nasukimat ti City Licensing Office ti naipaayan iti notice of violation kalpasan a saan dagitoy nga nagtulnog kadagiti protocols wenno ordinansa ti siudad partikular iti panagaramat iti face mask ken face shield, panagsurot iti social distancing, panangilako ken panaginom iti arak ken dagiti pagalagadan iti sidong ti General Community Quarantine (GCQ).
Kasaruno daytoy ti agtultuloy a panagwanawan ti nasao nga opisina kadagiti business establishments ditoy siudad tapnu masigurado ti panagtulnog dagitoy iti minimun health standards kontra iti COVID-19.
Sigun kenni CIty Licensing Officer Allan Abayao, nangisayangkatda iti 14 a rikos ti inspection kadagiti establishimento manipod Enero 1 aginga Pebrero 20.
Dumanon met iti P232,000 ti nakolektar dagitoy a multa kadagiti nasao nga panaglabsing manipod idi Enero 1 agingga Marso 6 ti agdama a tawen.
Maibasar iti record ti City Treasury Office, nakolektar ti nasao nga gatad manipod iti 228 a resibo dagiti indibidual ken establishimento a limabsing iti panagaramat ti face mask, face shield, social distancing wenno ti panangilako ken panag-inom iti arak.
Nainget met ti panagwanawan ti Baguio City Police Office ken ti Public Order and Safety Division kadagiti indibidual a lumablabsing kadagiti pagalagadan iti parapubliko a lugar tapnu masigurado ti panagtulnog dagitoy.
