BAGUIO CITY – Naipaayan iti Proficiency Seal ken Eagle Awards ti 35 nga units ti Police Regional Office – Cordillera (PROCor) iti maysa a seremonya sadiay Camp Bado Dangwa, La Trinidad, Benguet.
Indauluan da Police Brigadier General Allan Cuevillas, Deputy Director ti Directorate for Integrated Police Operations-Northern Luzon ken BGen Israel Ephraim Dickson, regional director ti PROCor ti panakaipaay dagiti nasao a pammadayaw kadagiti nasao nga units ti pulisya iti rehiyon.
Resulta daytoy ti balligi a panagpasada iti maikatlo nga stage ti transformations plan ti pulisya a naawagan ti PNP P.A.T.R.O.L. Plan 2030.
Naipaay ti Gold Eagle Award kadagiti police stations ti La Trinidad ken Bakun iti Benguet; iti Ifugao Provincial Mobile Force Company ken Lagawe iti Ifugao; ken ti Rizal iti Kalinga.
Naipaay met ti Silver Eagle Awards iti Benguet Provincial Mobile Force Company, iti municipal police stations ti Atok, Buguias, Itogon, Kabayan, Kapangan, Kibungan, Sablan, Tuba ken Tublay iti Benguet; ti Aguinaldo, Alfonso Lista, Asipulo, Banaue, Hingyon, Hungduan, Kiangan, Lamut, Mayoyao ken Tinoc iti Ifugao; iti Kalinga Provincial Mobile Force Company ken iti municipal police stations ti Balbalan, Lubuagan, Pasil, Pinukpuk, Tabuk, Tanudan ken Tinglayan iti Kalinga.
Naipaayan iti Gold Eagle Award dagiti awardees a nakaragpat iti rating a 96% nga agpangato bayat a naipaayan iti Silver Eagle Award dagiti awardees a nakaragpat iti ratings a 90% agingga 95.99%.
Naipaayan metlaeng iti plaque ken certificate of recognition dagiti nagduduma nga units ti Cordillera PNP gapu iti commendable performance ken invaluable services dagitoy a nagresulta iti balligi a panakaisayangkat ti 2019 midterm national and local elections.
Kabayatanna, iti Performance Governance System, naawat ti Cordillera PNP ti Golden Eagle Award iti Initiation Stage, Silver Eagle Award iti Compliance Stage ken Gold Eagle Award iti Proficiency Stage.
