BAGUIO CITY – Naiwaras ti 36,000 a doses ti Astrazeneca vaccine iti nagduduma a probinsia ti rehion Cordillera kalpasan a simmangpet daytoy idi Mayo 10 iti agdama a tawen.
Sigun kenni Department of Health-Cordillera Nurse Joyce Rillorta, 1,290 a vials ti naiturong iti siudad ti Baguio, 381 iti Ifugao ken 375 iti Abra.
Manamnama met a maipatulod iti kabiitan a panawen ti 444 a vials sadiay Mt. Province, 419 vials iti Benguet, 397 vials sadiay Kalinga ken 376 vials sadiay Apayao.
Innayonna a maipatulod ti 1,000 a vials ti Sinovac Vaccine iti Philippine Military Academy ken 80 vials iti Professional Regulations Commission.
Impetteng ni Rillorta nga agtultuloy latta ti panagbakunada kadagiti priority group tapno magun-od ti herd immunity iti rehiyon Cordillera.
