BAGUIO CITY -Dumanon iti 39 a wanted a tattao ti tiniliw ti nagduduma nga yunit ti Police Regional Office Cordillera (PROCOR) iti napalabas a lawas kas resulta ti nairtengan a manhunt operations ti pulisya kadagiti indibidual nga addaan sungsungbatan iti linteg.
Maibasar iti rekord ti Regional Investigation and Detective Management Division ti PROCOR, nailista ti Benguet Police ti kaaduan a natiliw a wanted persons a dimmanon iti 19 a sinaruno ti Baguio Police a dumanon iti 11.
Manipud kadagiti natiliw a wanted persons ket maysa ti nakalista a Most Wanted Person iti Regional Level, maysa iti Municipal Level ken tallo iti Station Level.
Nabigbig ti maikawalo a wanted person iti entero a Cordillera a ni Orlando Quilaton a sumangsango iti kaso a panagrames ken panaglabsing iti RA 7610 wenno ti Special Protection of Children Against Abuse, Exploitation and Discrimination Act.
Immuna metten nga inkari ti PROCOR ti panang-anopda kadagiti wanted persons tapnu maipaay ti hustisya kadagiti biktima ken pamilya dagiti biktima dagitoy.
