BAGUIO CITY – Nainget a palpalagipan manen ti pulisya ti publiko iti panagliklikda ti panagsugal kabayatan ti agdama a pandemya ken community quarantine.
Kasaruno daytoy ti panakakemmeg ti uppat a construction workers kalpasan a naaktuwan ti panagsugalda babaen iti pusoy dos iti maysa a billiard hall sadiay Rubber Tree Alley, Km.5 Asin, Baguio City idi laeng nabiit.
Nabigbig dagitoy a da Saldy Laduan, 40; Mark Morales, 31; Rayven Dago, 21 ken John Laduan, 40.
Nakumpiskar kadagitoy ti P230 a taya ken lima pulo ket dua a pidaso ti baraha.
Naiturong dagiti ebedensiya ken suspek ti kustodiya ti pulisya para ti umno a disposisyon ti kaso.
Inyunay-unay ni PMaj. Eddie Bagto, dadaulo ti BCPO-Station 9 a saan a rason ti agdama a quarantine tapnu agsugal gapu laeng iti panakaburyong.
