4 pimmusay, 7 nadangran iti nagsina nga aksidente sadiay Sabangan ken Sadanga Mt. Province
BAGUIO CITY–Pimmusay ti dua nga indibidual bayat a nadangran ti lima a dadduma pay iti panakatnag iti rangkis ti nagluganan dagitoy a Land Cruiser sadiay Sitio Palatong, Brgy Tambingan, Sabangan, Mt Province.
Nabigbig dagiti pimmusay da Corazon Longtiwen ken ni Hilda Lungaw, agpada nga agtawen iti limapulo ket uppat ken residente iti nasap a barangay.
Nadangran met ti driver a ni Joel Marcos, Estela Marcos ken ti tallo nga annak da.
Iti panaki-uman ti Bombo Radyo kenni PCI Bernard Wong,
panakangiwat ti Mt. Province PPO, nakarehistro ti nasao a lugan iti DPWH-Mt. Province.
Maibasar iti imbestigasion, agturong koma ti nasao a lugan sadiay Bontoc, Mt. Province idi napasamak ti aksidente.
Kinunana a nakadlis a kalsada iti nasao a lugar ken saan a nakontrol ti driver ti lugan agingga a natinnag daytoy iti agarop 250 metro kauneg a rangkis.
Naitaray dagiti pito a pasahero iti Luis Hora Regional Memorial Hospital ngem dua kadagitoy ti naideklara a pimmusay
Kabayatanna,
Pimmusay met laeng ti dua pay nga indibidual ken dua ti nadangran kalpasan a natnag iti rangkis ti nagluganda a pick-up sadiay Sitio Macamcamamar, Poblacion, Sadanga, Mountain Province.
Karaman kadagiti pimmusay ti driver a ni Charlie Dangiwan Domao-il, 34 anyos , baro ken residente ti Sacasacan, Sadanga, Mountain Province ken ti maysa pasahero a ni Johnson Kawi Faroden.
Nagsaprap met iti nakaro a dunor da Christian D. Copas ken Faustino Balso.
Sigun kenni PCI Bernard Wong,panakangiwat ti Mt. Province PPO, pasalog ti lugan iti nasao a lugar idi mapukaw ti control ti driver ken natinnagda iti rangkis.
Naimatangan dagiti estudyante ti insidente ken dagusda nga impadamag iti Sadanga MPS.
Naiturong dagiti biktima iti Bontoc General Hospital ngem naideklara a pimmusay ti driver ken maysa kadagiti pasahero.
