BAGUIO CITY – Naituding a lumaban ti uppat nga Igorot mixed martial artists iti kabarbaro nga mixed martial art promotion ditoy Asya inton June 10 sadiay Hainan, China.
Segun kenni Cordilleran promoter ken coach Darwin Miller Dep-ay, ti nasao a laban ket idaulwan ni sigud a Women’s International Boxing Association Light flyweight Champion Jujeath “Badgirl” Nagaowa.
Kinunana a mairaman pay iti event da Jeremy Bastian, Biondi Dayangadang ken ni Kathleen Papti-e.
Dinakamatna a maipaspasidong ita iti nainget a panagsanay dagiti nasao nga Igorot warriors tapnu maipakitada ti kinalaing dagitoy ken kinatured dagiti Cordillerans iti lubong ti MMA.
Innayona a nasken a mangipakitada iti napintas a laban tapnu maipaayanda pay iti napimpintas a laban iti masakbayan.
Makipaset pay iti kapada a laban ti South Korean fighter a ni Seongjin Chun nga agsansanay iti sidong ti promotion ken boxing gym da coach Dep-ay.