BAGUIO CITY – Agpapaimbagen dagiti uppat nga indibidual a nadangran iti panakabaliktad ti maysa a parapasahero a jeep sadiay Lamtagan, Barangay Bontoc Ili, Bontoc, Mountain Province idi kalman.
Nabigbig dagitoy a da Clifford Chamkas, 47, driver ti jeep; Betty Fararao, 65; Rosita Awingan, 65 ken Banayan Saowad, 66.
Maibasar iti report, napunno iti pasahero ti nasao a jeep nga addaan plaka nga AHA 615 ken nagtaud daytoy sadiay Dalican, Bontoc, Mountain Province ken agturongda kuma sadiay Madaymen, Kibungan, Benguet tapnu dumar-ay ti kallaysa.
Nupay kasta, bayat ti kaaddada iti dalan ket nakapasar ti jeep iti mechanical failure a nagresulta iti panangidungpar ti driver iti lugan iti igid ti bantay tapnu makaliklikda iti rangkis.
Nangitunda daytoy iti panakabaliktad ti nasao a jeep ken iti panakadunor dagiti uppat a pasahero a dagus a naiturong iti Luis Hora Memorial Regional Hospital.
Naamuan met a nagawid dagiti dadduma a pasahero a kaaduanna ket senior citizens ngem nakikoordinaren ti Bontoc Operations Center iti Barangay Health Emergency Team ti Dalican, Bontoc para iti panakaiwanwan ti kasasaad dagiti nasao nga indibidual.
