Nakairekord ti Philippine National Police-Anti-Kidnapping Group (PNP-AKG) ti pakabuklan nga uppat a pulo a kaso ti kidnapping, sangapulo kadagitoy ket karaman dagiti Chinese nationals kas biktima, ken amin ket naipadamag a kinabkabil dagiti padada a Chinese sipud pay idi Enero, idi napalabas a tawen.
Iti kaudian nga imbestigasion, naduktalan a sumagmamno a “criminal incidents,” karaman ti kidnapping, ket nagtaud iti panagsusupiat a mainaig iti underground gambling ken cyber fraud—iligal nga aktibidad a masansan a mainaig iti offshore gaming operations, sigun iti Philippine National Police.
Ti kaso itay laeng nabiit a manarimaan paylaeng a maim-imbestigaran ket ti pannakapukaw ti maysa a Chinese national a naudi a nakita idi Pebrero 20 sadiay Taguig City.
Bayat ti panangsurot dagiti otoridad iti adu a leads, kinuna ti PNP a siaannad a suksukimatenda ti amin nga anggulo tapno maamuan dagiti kinapudno ken masigurado ti hustisia.
Agtaltalinaed nga alerto dagiti kameng ti pulisia iti panagmonitor ken panagrisut iti krimen karaman dagiti kaso iti illegal detention, financial fraud, ken human trafficking.
Kinuna ti Criminal Investigation and Detection Group (CIDG) nga immunan a nangbukelda ti specialized tracking team tapno mapalawa pay ti panagreggetda kontra iti Philippine offshore gaming operators (POGOs), nga agtultuloy ti operasion iti Pilipinas iti nasurok maysa a bulan kalpasan nga opisial nga impawil ti gobierno ti nasao nga aktibidad.
