Naituding a mangipila ti Philippine National Police-Criminal Investigation and Detection Group iti kriminal a kaso kontra kadagiti nasurok 40 nga indibidwal a maatap a karaman iti kinaranggas kabayatan ti naipatungpal a tignay-protesta idiay Ayala Bridge ken Mendiola idiay Manila idi September 21, 2025.
Sigun kenni CIDG Director Police Major General Robert Morico II, manarimaan itan iti panangipinal dagiti imbestigador kadagiti dokumento kontra kadagiti suspek pakairamanan dagiti maatap a nangpondo kadagitoy kasta metten dagiti instigator wenno pasimuno.
Karaman kadagiti im-imbestigaranda dagiti napasamak nga uram, dagiti nangdangran kadagiti kapadada a tao pakairamanan dagiti kameng iti pulisya, sibilyan, dagiti nangdadael kadagiti pasilidad ken kagawaan, ken daduma pay a tignay kinaranggas.
Kagiddan dayta, inlawlawag ti opisyal a saanda a puntirya nga imbestigaran dagiti nakappia ti panakipagrallyda nu di ket dagiti laeng nangipatungpal iti kinaranggas tapno maipaayan ida iti kaskenan a pannusa nangruna dagiti maatap nga adda iti nangangato a posisyon a nangplano iti daytoy.
