--Ads--
BAGUIO CITY – Nakemmeg ti maysa nga indibidual iti buy-bust operation nga impatungpal dagiti kameng ti pulisya idiay Paredes St. Barangay Zone 7, Bangued, Abra.
Nabigbig ti suspek iti alyas “Dondon”, 46-anyos, naasawaan ken residente ti Cabaroan, Tayum, Abra.
Nakumpiskar manipud iti suspek ti uppat a pakete ti maatap a shabu nga agdagsen ti 3.81 grams ken mapatta-patta nga agbalor ti P25,908.
Sumangsango ti lalaki iti kaso a panaglabsing iti Republic Act 9165 wenno Comprehensive Dangerous Drugs Act of 2002.
Ti panakatiliw ni alyas Dondon ket pammaneknek ti nainget a kampanya dagiti maseknan nga otoridad ken nagduduma nga ahensiya kontra iligal a droga.
