BAGUIO CITY – Maipaspasidong ita iti imbestigasyon ti maysa a 1st Class Cadet ken uppat a 2nd Class Cadets a responsable iti panag-hazing iti uppat a plebo iti nagsina nga insidente ti panagmaltrato a naalaan ti videos iti uneg ti Philippine Military Academy (PMA).
Iti interview ti Bombo Radyo kenni PMA public information officer Captain Cherryl Tindog, kinunana a ti maikanem a suspek a kadete ket naikkaten iti akademya idi pay napalabas a tawen gapu iti panaglabsing daytoy iti Honor Code.
Kinumpirmarna met ti kinapudno ti dua a videos a pakabuyaan iti panagparigat kadagiti uppat a kadete idi pay 2017 ken 2018 no sadino, dagitoy a kadete ket 3rd Class Cadets ita.
Kinunana a kalpasan a nabuya da ti videos idi rabii ti Lunes ket dagus nga im-pull-out-da manipud iti klaseda dagiti kadete a suspek ken naiturongda iti holding area ti akademya.
Innayonna nga aramatenda dagiti videos iti maisaysayangkat nga imbestigasyon nangruna ta saan nga agulbod dagiti videos.
Mangnamnama ni Capt. Tindog nga iti kabiitan a panawen ket maipataw ti pannusa kadagiti responsable a kadete ken maikkaten dagitoy iti PMA.
Inwaragawagna met nasayaat iti PMA a nairuar ti videos gaputa aramatenda daytoy iti panag-emphasize kadagiti kadete a saan a makalibas wenno makaliklik dagitoy no labsingenda dagiti pagalagadan ti akademya.
Kinunana nga iyunay-unayda kadagiti kadete ti kinapateg ti panagbalin a responsable ken accountable dagitoy iti aniaman nga aksiyonda.
Impettengna nga uray adda ti pagalagadan ti PMA no pilyen dagiti kadete a labsingen dagitoy ket kasapulan a sangwenda ti resulta ti aksionda.
