![](https://img.bomboradyo.com/baguio/2019/05/abraaaaaaaaaaa.jpg)
BAGUIO CITY – Nakasangpeten sadiay Abra ti 500 a kanayonan a soldado nga agbantay sadiay iti maangay a midterm elections inton Lunes, May 13.
Nagtaud dagitoy iti 45th Infantry Battalion (IB) ti Philippine Army a nakabase sadiay Fort Magsaysay, Nueva Ecija.
Tumulong dagitoy kadagiti soldado ti 24th Infantry Battalion ti Philippine Army a nakabase met sadiay Lagangilang, Abra ken kadagiti pulis.
Sigun kenni Lt. Col. Nolito Quemi, battalion commander ti 45th IB, PA, agserbi a quick reaction team ti augmentation force kadagiti mabambantayan wenno kritikal a munisipyo sadiay Abra.
Inkarida pay ti panagtalinaed dagiti soldado a non-partisan iti panangipatungpalda ti trabahoda.
Naamuan nga iti pakabuklan ket sag-1,000 a soldado ken pulis ti agtitinnulong para iti panagballigi ti eleksion sadiay Abra inton Lunes.
Nailatagen idi kalman ti deployment plan dagitoy.
Maipalagip a ti Abra ket adda iti red category ti election hotspot ita a May 2019 midterm elections.