Pinasardeng ti Department of Education (DepEd) ti limapulo ket lima a pribado a pagadalan manipud iti Senior High School (SHS) Voucher Program gapu kadagiti mapagduaduaan a “claims” ti nasao a programa, sigun iti maysa nga opisial.
Bayat ti panagdinggeg ti House Committee on Basic Education and Culture, kinuna ni Department of Education (DepEd) Project Manager III Tara Rama nga agarup ti limapulo ket lima a pribado a pribado a pagadalan ti naikkat iti programa manipud idi Pebrero 2021 gapu iti saan nga agtunos a billing information ken ti learners information system (LIS).
Idi nadamag no mano a voucher ti nabati a masayang, kinuna ni Rama a saan a kumurang iti P200 million a pondo ti inted ti Department of Education (DepEd).
Sigun kenni Rama, adda met dagiti pribado a pagadalan a nag-claim para kadagiti estudiante a nagpalista iti bukodda nga institusion ngem immakar kadagiti parapubliko a pagadalan.
Maipalagip nga idi Pebrero, nagpaayab ni House Assistant Majority Leader Jil Bongalon para iti congressional inquiry iti mapapati a kaadda ti ghost beneficiaries” ti SHS vouchers.
Daytoy ket kalpasan a naduktalan kadagiti 12 a pampribado a pagadalan nga adda ti “ghost beneficiaries” babaen ti panangisubmitirda iti bogus a listaan dagiti nag-enrol.
Ti SHS voucher program ket mangipapay ti pinansial a tulong kadagiti kualipikado nga estudiante a kayatna nga ag-enrol kadagiti pribado a pagadalan ti senior high schools.
