BAGUIO CITY – Natiliw ti innem nga indibidual gapu iti panangisayangkatda ti iligal a pallot sadiay Subusob, Sallapadan, Abra idi kanikadua, May 16, 2021.
Nabigbig dagitoy a da Elvis Openg, 46; Jhun Lizardo, 40; Romulo Claro, 51; Abelardo Talape, 40; Francis Jaquias, 34 ken Domingo Cabarubias, 43, bin-ig a residente ti Abra.
Maibasar iti report, nakaawat dagiti pulis iti impormasyon manipud iti maseknan nga umili mainaig iti maisaysayangkat nga iligal a pallot iti nagbeddengan ti Bucay ken Sallapadan, Abra.
Dagus met a nagresponde dagiti pulis a nagresulta iti panakatiliw dagiti innem nga indibidual.
Nakumpiskar kadagitoy ti 27 a tadi, taya, maysa a natay a kawitan, maysa a nasugatan a kawitan, tallo a kartib ken maysa a surgical clamp.
Gapu iti daytoy, napilaan dagiti innem iti kaso a panaglabsing iti Presidential Decree No. 1602 wenno ti illegal gambling.
