BAGUIO CITY – Dumanon iti 65 a pagmulaan sadiay Buguias ken Mankayan, Benguet ti manamnama a makaawat iti Good Agricultural Practices (GAP) Certificates kalpasan a nairekord ti 96% agingga 100% a panagtungpalda iti Philippine National Standard Code para iti GAP kadagiti natnateng ken prutas.
Kasaruno daytoy ti panaginspeksion ti Philippine Good Agricultural Practices (PhilGAP) Inspectors manipud iti Bureau of Plant Industry (BPI)-Manila iti pagmulaan dagiti nasao a mannalon idi napalabas a lawas.
Maibasar iti datus ti Department of Agriculture (DA)-Cordillera, 19 a pagmulaan ti para iti renewal ti GAP Certificates bayat a 46 dagiti baro nga aplikante iti nasao a sertipikasyon.
Dinakamat met ni Doweno Santiago Jr., focal person ti GAP iti DA-Cordillera a maitaltal-o ti sertipikasyon ti GAP kadagiti mannalon tapnu maipasigurado ti kinatalged dagiti taraon ken ti kalidad dagiti produkto ti agrikultura kagiddan ti panakasalwad ti aglawlaw ken ti salun-at, kinatalged ken pakabuklan a pagsayaatan dagiti agtatrabaho kadagiti pagmulaan.
Kabayatanna, sinarungkaran pay dagiti PhilGAP Inspectors dagiti 32 a pagmulaan a GAP Certified sadiay Itogon, Buguias ken Mankayan iti Benguet ken sadiay Bauko iti Mountain Province.
Naobserbaran met ti panangmintinir dagiti nasao a pagmulaan iti panagtungpal dagitoy kadagiti standards ti GAP malaksid kadagiti sumagmamano a naipaayan ti rekomendasyon para iti panakapasayaat pay ti pagmulaan dagitoy.
Maibasar iti rekord ti DA, idi March 1 iti agdama a tawen ket pakabuklan a 185 dagiti pagmulaan iti Cordillera a naipaayan ti GAP Certificate ken kaaduan wenno 153 ket masarakan iti Benguet.
