BAGUIO CITY – Dumanonen iti 66 a transport cooperatives ti impaayan ti Land Transportation Franchising and Regulatory Board (LTFRB) – Cordillera iti akreditasyon tapnu makabiaheda iti nagduduma a ruta iti siudad ti Baguio.
Sigun kenni LTFRB-Cordillera Regional Director Engr. Lalaine Sobremonte, karaman ditoy ti Cordillera Basic Sectors Transport Cooperative, Baguio Benguet Transport Cooperative, Baguio PUV Transport Corporation, BAMAPCOM Entreprenuers Multipurpose Cooperative, Kaaruba Transport Service Cooperative ken dadduma pay.
Innayonna a dumanon met iti 29 a legal entities ti nag-aplikar para iti consolidation kas maibasar iti datos a nakolektarda idi January 15 ti agdama a tawen.
Kinunana a ti nasao a bilang ket bukbuklen ti 67 para iti PUJ routes, 14 para iti UV Express routes ken maysa a mini bus a katukad iti nasurok nga 800 a yunit ti lugan.
Nupay kasta, kinunana a bassit paylaeng daytoy a bilang no idilig iti bilang dagiti parapasahero a jeep iti entero a Cordillera a dumanon iti nasurok 5,000.
Gapu iti daytoy, iyap-apela ni Engr. Sobremonte ti panag-consolidate dagiti dadduma pay nga asosasyon dagiti parapubliko a lugan tapnu ad-adda a mapapintas ti kasasaad ti transportasyon iti pagilian babaen iti PUV Modernization Program.
Maipalagip a nailaylayon agingga inton March 31 ti agdama a tawen ti deadline ti panag-consolidate dagiti individual franchise holders dagiti parapasahero a lugan iti pagilian.
