Saanen a panangikalikagum dagiti government bank ti business permit kadagiti transport cooperative iti Baguio City nga aglukatda ti bank account, makidkiddaw
Kiniddaw ti lokal a gobierno ti Baguio City iti Land Bank of the Philippines (LBP) nga ikatenda ti business permit kas requirement dagiti transport cooperatives wenno corporation nu aglukatda ti bank account.
Iti sidong ti Resolution No. 143, series of 2022, kinunana dagiti konsehal a nasken a maawatan ti government bank ti sitwasion ti siudad ken dagiti transport cooperatives wenno corporations gaputa mabigbigbigen dagitoy kas legal entity babaen iti certificate of registration dagitoy a naalada iti Cooperative Development Authority (CDA) wenno iti Securities and Exchange Commission (SEC).
Impetteng ti konseho a kaadoan kadagiti kooperatiba wenno korporasion iti siudad ket kabarbaro laeng nu sadino ti address dagitoy ket nainagan iti pagtaengan ti maysa nga opisial wenno miembro ken kaadoan kadagitoy ket awanan ti business permit.
Immunan nga inkalikagum ti Land Transportation and Regulatory Board (LTFRB) ti panagaplikar dagiti transport cooperatives wenno corporations ti bank accounts kadagiti government bang tapno makapagnumarda iti service contract program wenno daduma pay a programa ti ahensia ken ti Department of Transportation.
Nupay kasta, ikalkalikagum ti Land Bank ti panangiparang dagiti transport cooperatives ken corporations ti business permit kas kangrunaan a dokumento iti panaglukatda ti bank account.
Sigun iti konseho, maysa a requirement iti panagaplikar ti business permit iti City Permits and Licensing Division ket locational wenno zoning certificate a naala manipud iti City Planning and Development Office (CPDO) wenno iti City Market office.
Malaksid iti dayta, kasapulan metlaeng nga iparang dagiti aplikante ti titulo ti daga wenno tax declaration ti real property ken building permit nga iti agdama ket pagparparikutan ti lokal a gobierno ti siudad gaputa kaadoan kadagiti negosio ket saanda a nakapagrenew gapu iti kainget dagiti requirement.
