Napaikkat iti pwesto dagiti pito a kameng iti pulisya idiay Manila kalpasan nga inreklamo ida ti delivery rider nga inarestarda gapu iti maatap nga iligal a droga.
Sigun iti National Police Commission (NAPOLCOM), pinilaandan iti kaso a grave misconduct, grave irregularity in the performance of duty, ken conduct unbecoming of a police officer dagiti pito a pulis kasaruno ti insidente.
Maibasar iti report, dua a rider ti pinosasan dagiti nasao a pulis idi laeng Martes idiay Sampaloc, Manila.
Sigun iti rider a nagreklamo, gumatgatang daytoy iti milktea ken naginnistoryada iti kapadana metlaeng a rider idi simmangpet dagiti pulis.
Innayon ti saanen nainaganan a rider a naisakay daytoy ken ti kadwana iti nagsina wenno nagsinnabali a lugan ken saanda nga ammo nu apay a naarestarda.
Dinakamatna metlaeng nga innala pay dagiti pulis ti cellphones, balitok a singsing, motorsiklo, kasta metten ti kwarta a karga ti GCash daytoy nga aggatad iti ₱9000.
Nakalasat laeng ti maysa a rider idi nagsardeng ti lugan a nakaisakayanna iti maysa a panganan rason a nakapagreport daytoy.
Babaen met iti pammilin ni Manila Mayor Isko Moreno, inikkat ni Manila Police District (MPD) acting director Police Brigadier General Arnold Abad dagiti pito a pulis iti serbisyo kasaruno ti panangireklamo ti rider kadagitoy.
