BAGUIO CITY – Naituding a 70,000 a pamilya iti entero a Benguet ti agnumar iti Social Amelioration Program (SAP) ti nasyonal a gobyerno para kadagiti pamilya nga apektado gapu iti Enhanced Community Quarantine (ECQ) nga intunda ti COVID-19 pandemic.
Iti panakiyuman ti Bombo Radyo Baguio kenni Benguet Governor Melchor Diclas, inaklonna a kurang ti nailatang a quota para iti probinsia no maiwaras kadagiti tunggal munisipyo.
Nupay kasta, impettengna nga awan ti maaramidanda ta isu met ti inted ti nasyonal a gobyerno para iti probinsia.
Gapu iti daytoy, imbilinna kadagiti barangay captains ti panag-aramat dagitoy iti sirib ken laing iti panangbigbigda kadagiti pamilya a maiparbeng ken rumbeng laeng a makaawat iti nasao a tulong pinansial.
Inyunay-unayna a nasken a dagiti pamilya nga agkasapulan a talaga ti maikabil iti listaan dagiti agnumar iti SAP.
