Agtaltalinaed itan dagiti pito pulo ket lima a pamilya wenno 172 nga indibidual idiay Abra kadagiti evacuation centers kalpasan a naitayab dagiti bubong ti pagtaengan dagitoy gapu paylaeng iti mapaspasaran nga epekto ti bagyo a Marce.
Iti interview ti Bombo Radyo kenni Regional Director Maria Aplaten manipud iti Department of Social Welfare and Development-Cordillera, kinunana a nagbakwit metlaeng dagitoy gapu iti napigsa a tudo ken angin sadiay partikular kadagiti agnanaed kadagiti asideg iti karayan.
Sigun kenkuana, adda metten ti lima gasut a family food packs ken non-food items a naipaay kadagiti nadamakat a pamilya.
Impasiguradona metlaeng nga umdas ti suplay ti opisina dagitoy iti kanito a maibus dagiti immun-una nga stocks dagiti relief goods.
