Narambakan ti 80th Baguio Liberation Day 2025 Anniversary sadiay Veterans Park, Harrison Road idi kalman.
Ti nagserbi kas kangrunaan a bisita ket ni Armed Forces of the Philippines (AFP) Chief of Staff Gen. Romeo S. Brawner, Jr.
Ni Mayor Benjamin Magalong ti nangipaay iti welcome remarks bayat a ni Teresa Pomar, ti chairperson ti United States Armed Forces in the Philippines-Northern Luzon (USAFIP-NL) – Baguio Benguet Chapter board ti nangipaay met iti kararag para kadagiti World War II veterans.
Iti nasao nga aktibidad, nabigbig dagiti beterano, partikular dagiti United States ken Philippines forces manipud iti 33rd ken 37th Divisions iti Sixth US Army ken Cordilleran guerillas iti 66th Infantry, United States Armed Forces in the Philippines-Northern Luzon.
Sigun kenni Mayor Magalong, ti nasao nga aktibidad ket mangipakita iti historic victory a mangisimsimbolo iti resilience, courage ken panagkaykaysa ti Allied Forces ken dagiti Pilipino.
Maipalagip nga idi Abril 27, 1945 ket naideklara ti panakawayawaya ti siudad ti Baguio manipud kadagiti Hapon idi World War II.
Daytoy ket babaen iti tulong dagiti Amerikano.
Kas pananglagip iti napasamak idi World War II, naipakita ti maysa a photo walk exhibition iti kalatakan a mall iti siudad.
Naiparang ditoy ti sigud nga hitsura ti siudad idi ken iti agdama kasta met a nakasurat dagiti napateg nga impormasyon maipapan seknan iti nasao a banag wenno pasamak.
Malaksid iti dayta ket maimatangan met laeng dagiti old relics ken daduma pay.
Naituding a ti photowalk exhibition ket agleppas inton Mayo a singko iti agdama a tawen.
