BAGUIO CITY – Nairikep wenno ‘totally closed’ ita ti Poblacion-Palina Road sadiay Kibungan, Benguet gapu iti panakargaay ti bantay nga intunda ti panagbaybayakabak ti tudo.
Sigun kenni Mayor Ceasar Molitas, kangrunaan nga apektado iti daytoy dagiti residente ti Ampusongan, Bakun; Palina, Kibungan ken dadduma pay a kabangibang a barangay.
Impaka-ammona metten iti maseknan nga ahensia ti nasao a parikot ngem gapu iti napigsa a tudo sadiay ken ita nga aldaw a maipatungpal ti clearing operation.
Dinakamatna a bantay ti nargaay isut gapuna a saan a basta-basta a magaraw ti landslide gaputa posible a mangitunda pay iti dakdakkel a parikut.
Naamuan nga adu met dagiti nailaw-an a nagna iti nasao a kalsada nangruna ta idi laeng malem kalman a napasamak ti insidente nupay addan sadiay dagiti kameng ti pulisya ken barangay officials a mangimando iti trapiko ken mangbalakad kadagiti motorista.
Dinakamatna nga adda dagiti turista manipud Metro Manila a na-stranded sadiay Barangay Tacadang ngem ag-hiking dagitoy ita nga aldaw paturong iti Barangay Poblacion tapnu makaawid dagitoy.
Impanamnama met ti mayor a dagusna nga ipakaammo apaman a malukatan ti Poblacion-Palina Road kagiddan ti apelana kadagiti umili ti Kibungan iti panagridam dagitoy iti panagdalyasatda iti kalsada tapnu makaliklik dagitoy iti aniaman nga aksidente.
