BAGUIO CITY – Kinumpirmar ti Pinget National High School iti siudad ti Baguio a naawat daytoy ti report seknan iti insidente ti bullying a nakairamanan dagiti estudiante, agraman ti maipagarup a physical assault ken ti pannakaivideo ti insidente sadiay La Trinidad, Benguet.
Iti nasao nga insidente walo nga estudiante ti nagtaud iti Pinget National High School.
Maibasar iti opisyal nga statement ti pagadalan, maipapaayan iti aksyon ti nasao nga isyu a maibasar kadagiti polisiya ti DepEd child protection, anti-bullying, ken case-management policies.
Sigun iti nasao a pagadalan, insayangkatda ti umno nga aksyon apaman a naawatda ti report.
Naipasidong ti biktima nga estudiante iti Psychological First Aid, medical assessment, ken naaramid ti modular lesson delivery.
Naipaayan dagiti estudiante a nairaman iti processing ken reflection activities ken nangisayangkat ti nasao a pagadalan iti conference babaen iti School Child Protection Committee.
Malaksid iti dayta, nakikoordinar dagitoy iti La Trinidad Municipal Police Station ken iti Schools Division Office.
Agtultuloy ti fact-finding process tapno maikeddeng dagiti umno nga addang iti sidong dagiti agdama a pagalagadan.
Kabayatanna, idagdagadag ti nasao pagadalan iti publiko a saan a mangirekord, mangibinglay, wenno agiwaras iti aniaman a video, ladawan, wenno impormasyon a mainaig iti napasamak a bullying.
Impanamnama ti Pinget National High School a ti nasao nga isyu ket kompidensial, patas, ken maitunos iti maiparbeng a proseso.
